ផលិតផលស្ករត្នោតនៅខេត្តកំពង់ស្ពឺឆ្នាំនេះមានទីផ្សារល្អ
ថ្ងៃអាទិត្យ ទី១៧ ខែឧសភា ឆ្នាំ២០១៥ ម៉ោង ១១:០៣
ខេត្តកំពង់ស្ពឺ ៖ ផលិតផលស្ករត្នោតកំពង់ស្ពឺឆ្នាំនេះមានទីផ្សារល្អ ខណៈដែលការប្រមូលផលមិនទាន់បញ្ចប់រដូវកាលនៅឡើយ ។ ចំពោះទិន្នផលស្ករដែលសហគមន៍បានផលិតទាំងប៉ុន្មាន ត្រូវបានក្រុមអាជីវករក្នុងស្រុកនិងក្រុមហ៊ុនចំនួន៨ដែលនាំចេញទៅក្រៅប្រទេស បានកុម្មង់យករួចរាល់អស់ហើយ ក្នុងនោះមានក្រុមហ៊ុនខ្លះក៏បាននាំចេញ និងក្រុមហ៊ុខ្លះទៀតពុំទាន់នាំចេញពីសហគមន៍នៅឡើយ ។
លោក ហុង ហឿន ប្រធានសហគមន៍អភិវឌ្ឍន៍ស្ករតោ្នតកំពង់ស្ពឺបានឲ្យដឹងថា ក្រុមអ្នកផលិតស្ករត្នោតកំពង់ស្ពឺ គិតមកពេលនេះមិនទាន់បញ្ចប់ការប្រមូលផលនៅឡើយទេ តែនឹងអាចបញ្ចប់នៅចុងខែឧសភានេះ ។ ផលិតផលស្ករត្នោតកំពង់ស្ពឺសព្វថ្ងៃមានដូចជា ស្ករម្សៅ និងស្ករសាច់ គឺមានសន្ទុះទីផ្សារល្អ ទាំងនៅក្នុងនិងក្រៅស្រុក ជាក់ស្តែងបរិមាណស្ករម្សៅជាង៤០តោន និងស្ករសាច់ជាង១០តោន ត្រូវបានអតិថិជនកុម្មង់យកអស់ពីសហគមន៍តែម្ដង ។ នៅក្នុងរដូវផលិតស្ករឆ្នាំនេះ សហគមន៍ទទួលបានការកុម្មង់ពីក្រុមហ៊ុនចំនួន៨នូវបរិមាណស្ករចំនួន៦៥តោន សម្រាប់នាំចេញទៅក្រៅប្រទេស ហើយគិតមកដល់ពេលនេះ ការផលិតរបស់យើងមិនទាន់ឆ្លើយតបបាននៅឡើយ ប៉ុន្តែយើងរំពឹងថានៅពេលបញ្ចប់ការប្រមូលផល នឹងអាចផលិតស្ករលើសពីតម្រូវការនេះប្រមាណជា១០តោនបន្ថែមទៀត ។
លោកថា ទោះបីឆ្នាំនេះការផលិតស្កររបស់សមាជិកនៅក្នុងសហគមន៍ធ្លាក់ចុះបន្តិចក្តី តែប្រជាកសិករអាចរកចំណូលបានមួយផ្នែកទៀត ក្រៅពីការធ្វើស្រែចម្ការ ហើយពួកគាត់សប្បាយចិត្តជាខ្លាំង ដោយឆ្នាំនេះ ស្ករម្សៅមួយគីឡូក្រាមអាចលក់បាន៥.៥០០រៀល ដែលខុសប្លែកពីឆ្នាំចាស់ យើងផលិតបានច្រើនតែពុំសូវមានទីផ្សារ និងមានតម្លៃទាប ។
លោកបញ្ជាក់ថា ស្ករត្នោតកំពង់ស្ពឺ ក្រៅពីទទួលបានទីផ្សារល្អហើយ ពេលនេះសហគមន៍ទទួលបានការកុម្មង់ទុកពីក្រុមហ៊ុន១នៅក្នុងស្រុកថែមទៀត ដើម្បីឲ្យសហគមន៍ផលិតស្ករសម្រាប់ឆ្នាំ២០១៦ ចំនួន១២០តោន ដោយក្នុង១ខែត្រូវផ្គត់ផ្គង់ឲ្យគេចំនួន១០តោនជាប្រចាំ ដូច្នេះវាកាន់តែធ្វើឲ្យស្ករត្នោតកំពង់ស្ពឺ មានវិសាលភាព ជាងមុន និងជឿជាក់ពីអតិថិជនថែមទៀត ដែលធ្វើឲ្យលោកលែងព្រួយបារម្ភពីទីផ្សារទៀតហើយ ៕
brought to you by IT Koh Trol
0 comments:
Post a Comment