ប្រើភេសជ្ជៈប៉ូវកម្លាំងធ្វើឱ្យប៉ះពាល់ដល់សុខភាពក្មេងវ័យជំទង់
ថ្ងៃចន្ទ ទី១៨ ខែឧសភា ឆ្នាំ២០១៥ ម៉ោង ១០:៤២
យោងតាមការសិក្សាស្រាវជ្រាវមួយរបស់កាណាដាបង្ហាញថា ការទទួលទានបណ្តាភេសជ្ជៈប៉ូវកម្លាំងដែលមានសារធាតុកាហ្វេអីុនខ្ពស់អាចក្លាយជាចំណុចផ្តើមនៃការប្រព្រឹត្តបញ្ហាខុសឆ្គងនានាក្នុងចំណោមក្មេងវ័យជំទង់ឬសិស្សវិទ្យាល័យ ។ ការសិក្សាបានបន្តថា នៅពេលក្មេងវ័យជំទង់ផឹកកាន់តែច្រើន នោះពួកគេនឹងមានអារម្មណ៍តក់ស្លុតឬក្រៀមក្រំចិត្តកាន់តែខ្លាំង ហើយបន្ទាប់មក មានចិត្តចង់សាកល្បងបទពិសោធន៍ប្លែកៗ ក្នុងនោះមានដូចជា ការជក់បារី និងសេពគ្រឿងស្រវឹងផងដែរ ។
សាស្ត្រាចារ្យ Sunday Azagba អ្នកដឹកនាំការសិក្សាមកពីសាកលវិទ្យាល័យ University of Waterloo ប្រទេសកាណាដាបានថ្លែងថា ៖«បណ្តាក្មេងវ័យជំទង់មានទំនោរយកភេសជ្ជៈប៉ូវកម្លាំងលាយជាមួយស្រា ហើយនោះគឺជាបញ្ហាមួយ ។ យើងចង់បង្កើនឱ្យមានការយល់ដឹងកាន់តែខ្លាំងអំពីបញ្ហានេះ ។ បច្ចុប្បន្ន ការប្រើប្រាស់ភេសជ្ជៈប៉ូវកម្លាំងកំពុងតែសស្រាក់សស្រាំក្នុងចំណោមក្មេងវ័យជំទង់និងសិស្សសាលាចាប់ពីអនុវិទ្យាល័យឡើងទៅ »។
ការសិក្សាបានរកឃើញទៀតថា ការប្រើប្រាស់ភេសជ្ជៈប៉ូវកម្លាំងសាមញ្ញបំផុតក្នុងចំណោមក្មេងៗដែលចូលចិត្តស្វែងរកភាពរំភើបរីករាយ ក្មេងដែលមានពិន្ទុនៃការធុញថប់ក្នុងអារម្មណ៍ខ្ពស់និងក្មេងៗដែលជក់បារី កញ្ឆានិងផឹកស្រា ។ ជារឿយៗ ក្មេងប្រុសប្រើប្រាស់ភេសជ្ជៈប៉ូវកម្លាំងច្រើនជាងក្មេងស្រី ។
ចូលរួមជាមតិចំណាប់អារម្មណ៍ចំពោះលទ្ធផលនៃការសិក្សានេះ លោកស្រីអីុវ៉ាន់នី ធេរីម៉ាកអេលរ៉ាត អ្នកឯកទេសសុខភាពមកពីសាកលវិទ្យាល័យ University of Michiganបានបញ្ជាក់ថា ៖«សាធារណជន ជាពិសេសអាណាព្យាបាល ចាំបាច់ត្រូវតែស្វែងយល់ពីការប្រើប្រាស់ភេសជ្ជៈប៉ូវកម្លាំងដ៏ច្រើនលើសលប់ក្នុងចំណោមក្មេងវ័យជំទង់ »៕
brought to you by IT Koh Trol
0 comments:
Post a Comment