ការរស់នៅល្អអាចជួយពន្យារឱកាសកើតជំងឺភ្លេចភ្លាំងដល់12ឆ្នាំ
ថ្ងៃចន្ទ ទី១៨ ខែឧសភា ឆ្នាំ២០១៥ ម៉ោង ១០:៤៨
ក្រុមអ្នកស្រាវជ្រាវចក្រភពអង់គ្លេសបានអះអាងថា របៀបរបបនៃការរស់នៅល្អអាចនឹងជួយពន្យារឱកាសកើតជំងឺវង្វេងវង្វាន់ភ្លេចភ្លាំងបានរហូតដល់១២ឆ្នាំ ។
ពួកគេថា ជំងឺបេះដូងអាចនឹងត្រូវបានទប់ស្កាត់ក្នុងរយៈពេល៦ឆ្នាំធៀបនឹងបុគ្គលដែលមិនយកចិត្តទុកដាក់ហាត់ប្រាណនិងរបបអាហារទទួលទាន ។ ការរស់នៅល្អត្រូវប្រកាន់ខ្ជាប់នូវកត្ដា៥ចំណុចគឺការហាត់ប្រាណទៀងទាត់រាល់ថ្ងៃ មិនជក់បារី មិនផឹកស្រាច្រើនហួសកម្រិត ទទួលទានរបបអាហារល្អ និងរក្សាទម្ងន់ខ្លួនកុំឱ្យធាត់ជ្រុល ។
ការពិសោធលើបុរសវ័យ៤៥-៥៩ឆ្នាំចំនួន២ពាន់៥រយនាក់រយៈពេល៣៥ឆ្នាំបានបង្ហាញថា អ្នកដែលបានអនុវត្តយ៉ាងខ្ជាប់ខ្ជួននូវការរស់នៅល្អគឺ៦០ភាគរយអាចនឹងជៀសផុតពីការកើតជំងឺភ្លេចភ្លាំង ។ ចំណែកហានិភ័យនៃជំងឺគាំងបេះដូងនិងដាច់សរសៃឈាមខួរក្បាលត្រូវបានកាត់បន្ថយអស់៤០ភាគរយខណៈហានិភ័យជំងឺទឹកនោមផ្អែមអាចកាត់បន្ថយបានដល់ទៅ ៧០ភាគរយ ។
សាស្ត្រាចារ្យ Peter Elwood ជាអ្នកដឹកនាំការសិក្សានិយាយថា ការរកឃើញលើកនេះគឺជាការដាស់ស្មារតីដល់សាធារណជនទូទៅឱ្យងាកមកចាប់អារម្មណ៍លើការប្រើវិធីសាស្ត្រធម្មជាតិបង្ការបញ្ហាសុខភាពរបស់ខ្លួន ។ លោកបន្តថា៖«អំឡុងការពិសោធជាច្រើនឆ្នាំគឺមានបុរសតែ៣០នាក់ប៉ុណ្ណោះដែលអនុវត្តនូវការរស់នៅល្អទាំង៥ចំណុច ។ ថ្វីបើចំណុចទាំងនេះមិនអាចជួយការពារពួកគេពីការយាយីដោយជំងឺផ្សេងបានទាំងស្រុង តែវាក៏អាចជួយកាត់បន្ថយហានិភ័យបានផងដែរ ជាពិសេសគឺជំងឺវង្វេងវង្វាន់ ។ គិតពីរយៈពេល វាអាចពន្យារដល់១២ឆ្នាំខណៈជំងឺបេះដូងអាចពន្យារបាន៦ឆ្នាំ» ៕
brought to you by IT Koh Trol
0 comments:
Post a Comment